Timi le mmagwe ba be ba dula Toropong ya Mozala. Go be go na le selo sa go makatša ka ga Timi – meriri ya gagwe! E be e gola ka lebelo. E be e gola ka lebelo ka fao e lego gore Mokibelo o mongwe le o mongwe, mmago Timi o be a swanela go mo iša go mokoti gore meriri ya gagwe e kotiwe. Ge go na le selo se setee seo Timi a bego a sa se nyake, ke go kota meriri ya gagwe! Nako ya go kota meriri e be e le nako ya matshwenyego go Mma ka gobane Timi o be a lla. “Ga ke nyake go kota meriri ya ka!” o be a phela a realo.

Mma o be a mo gokara pele ba eya go motho wa go kota, efela ge ba fihla fao, Timi o be a lla ka megokgo. Gomme Mma o be a mo kunkuretša go leka gore Timi a iketle ge ba mo kota meriri. Ka nako ye nngwe o be a mo fa dikokisana. Timi o be a rata dikokisana, efela o be a tlo di ja a thome a lle gape. Ka nako ye nngwe Mma o be a tlo bina. O be a tlo binela ka go la nngele. O be a tlo binela ka go la goja. O be a tlo tšokotša mmele wa gagwe, efela Timi o be a tlo tšwela pele le go lla. Ge Jango, mokoti, a swanetše go thoma go kota meriri ya Timi, Timi o be a itokišetša go lla le go fetiša! La mathomo, o tlo sekhumula, gomme a llela tlase, ka morago a bokolele, “Hiyaa, hiyaa, hiyaa!”  “O kota meriri fela, Timi. Ga go bohloko,” Jango o tlo realo, a leka go homotša Timi, efela seo se be se dira gore Timi a bokolele le go feta.

Ka nako ye nngwe Jango o be a opela go leka gore Timi a homole, efela Timi o be a tšwela pele go lla. Ka letšatši le lengwe, Timi o bokoletše kudu ka fao bafeti ba tsela ba ilego ba tsena ka lebenkeleng la meriri go bona gore ke eng sa go dira gore mošemane a bokolele ka tsela ye! “Batho, wee! Ke mošemanyana yo a kotago meriri,” ba realo. Timi o be a se na taba gore batho ba tlile go mmona. O tšwetše pele ka go lla go fihlela Jango a fetša go mo kota meriri. Ka letšatši le lengwe, o hlabile mokgoši ka fao Koko Binite a ilego a tla a hlotša a swere patla ya gagwe. O be a dula kgauswi le lebenkele la meriri, efela o tsošitšwe borokong bja mosegare ke mokgoši wa Timi.

“Batho, wee!” Koko Binite a realo. “Ke be ke nagana gore go na le se šoro se diregago!” O ile a hlotša a boela ka ngwakong wa gagwe go tšeela Timi seripa sa hlapi ye a e bešitšego. “Ke dumela gore se se tlo dira gore a emiše go lla,” a nagana. Efela o rile ge a efa Timi hlapi, a e putetša, a e sohla a e kwametša … gomme a tšwela pele go lla! Timi o rile go tloga le mmagwe letšatšing leo, Jango a dula fase ka komiki ya teye a nagana a ba a nagana. Nnete gona go swanetše go ba le tsela ya go thibela Timi go lla ge a kota meriri! Gomme ke nako ye Jango a ilego a tlelwa ke kgopolo ye botse! “Ke yona! Ke e rarolotše,” a goeletša ka lethabo. Ka ketelo ya go latela ya Timi, e rile ge Jango a ntšha sekero, a thoma go anegela Timi kanegelo. “Kgale go ile gwa ba le mošemanyana yo a bego a sa nyake go kotwa meriri, ka fao o ile a e tlogela ya gola ya ba ya gola,” a realo Jango. “E gotše go fihlela hlogo ya gagwe e tlala ka ditlhale tša mahuto. Go se go ye kae ditlhale tša mahuto tša sopagana.” “Go diregile eng sa go latela?” gwa botšiša Timi, a emišitše go lla.

“Dintšhi le dikhunkhwane tše dingwe di ile tša fetola hlogo ya gagwe bodulo bja tšona,” gwa tšwela pele Jango. “Gomme gwa direga eng ka yena?” Timi a botšiša, a bonala a tshwenyegile. “Mošemanyana o ile a thoma go goga meriri ya gagwe le go ingwaya ka gobane dikhunkhwane tše di bego di gagaba hlogong ya gagwe di be di dira gore a hlohlonelwe kudukudu. O be a goga a ngwaya, a goga a ngwaya, letšatši ka moka. Go se go ye kae, hlogo ya gagwe le diatla tša gagwe tša thoma go ba bohloko ka lebaka la go goga le go ngwaya,” a realo Jango. “Batho, se a tšhoša seo! Gwa direga eng sa go latela?” gwa botšiša Timi, a kwela mošemanyana bohloko. “Hlogo ya gagwe le diatla di ile tša ruruga,” Jango a tšwelapele. “Ka letšatši le lengwe, mmagwe o ile a mo tliša lebenkeleng la ka. Ba rile go fihla fa, a fofela setulong gore meriri ya gagwe e kotwe. O dutše ka go iketla gore ke mo kote gabotsebotse.”

“Ka nnete?” gwa botšiša Timi. “Ee, go bjalo!” a realo Jango. “Gomme ke rile go fetša go kota mošemanyana meriri – bjalo ka fao ke dirilego ya gago gona bjale – mošemane a nkgokara ka kgokaro ye kgolo.” Timi o ile a lebelela hlogo ya gagwe. O be a feditše go kotwa! O be a ipshina ka kanegelo ka fao a sego a lemoga gore Jango o feditše go kota meriri ya gagwe. O fofile setulong gomme a gokara Jango ka kgokaro ye kgolo. O a tseba ke eng? Timi ga senke a hlwa a sa lla lebenkeleng la meriri ka gobane Jango o be a mo anegela kanegelo ye mpšha ka ketelo ye nngwe le ye nngwe! Gomme mmago Timi o be a thabile kudu ka gobane dikanegelo tša Jango di fedišitše matshwenyego a gagwe a go kota meriri a beke ka beke.